18/05/10
Bait wedi bachu S4C gyda brand Stwnsh
Mae’r darlledwr Cymraeg, S4C, ar y cyd gyda Boomerang, wedi comisiynu stiwdio graffig byw Bait i frandio’r gwasanaeth newydd i blant, sef Stwnsh.
Wedi’i lansio ym mis Mai i dargedu plant o 7-13 oed, Stwnsh yw ail ran strategaeth S4C i ehangu a chryfhau ei wasanaeth i blant o bob oed. Mae’r cydweithio diweddaraf rhwng Bait, cwmni o Gaerdydd, ac S4C yn dilyn ail-frandio diweddar Cyw, sef y gwasanaeth i blant cyn oedran ysgol.
Mae hunaniaeth newydd Stwnsh yn dangos nifer o gymeriadau gwrthgyferbyniol wedi’u cyfuno â gwahanol wrthrychau mewn ffordd anrhagweladwy a chyffrous i greu cyfres o ganlyniadau annisgwyl.
Ymysg yr uchafbwyntiau y mae clipiau gwallt a ffyrc sglodion sy’n peri i geir ffrwydro, sychwyr gwallt yn chwythu’n ddarnau a llifeiriant o laeth yn caledu yn yr awyr.
Yn sylwebu ar y brandio, meddai Cyfarwyddwr Creadigol Bait, Paul Nicholas: “Ystyr stwnsh yw ‘malu a chymysgu rhywbeth neu bethau’ ac felly roeddem eisiau delwedd o hunaniaeth oedd yn nodedig am ei gyfuniadau annisgwyl. Buom yn gweithio gyda gwrthrychau a delweddau sydd ddim fel rheol yn mynd gyda’i gilydd er mwyn creu canlyniad cwbl annisgwyliadwy i herio a denu’r gwylwyr.
“Roedd yn bwysig creu rhywbeth fyddai’n weledol gyffrous i’n helpu i gydied yn yr ystod oedran a dargedwyd gan gynnal safon hunaniaeth weledol sianel S4C trwodd a thro, ac mae hyn yn sicr wedi’i gyflawni.”
Ychwanegodd Rheolwr Gyfarwyddwr Bait, Owain Elidir: “Daw’r gwaith gydag S4C ar ddiwedd cyfnod cyffrous iawn i ni, gan ein bod wedi gweithio’n glos gydag MTV ar ffilmiau hyrwyddo i’w sianel MTV Shows a chyda phrif ganwr y Super Furry Animals, Gruff Rhys, ar effeithiau gweledol ar gyfer ei ffilm nodwedd ‘Seperado!’.
"Mae’r cwmni’n tyfu o fewn y farchnad raffig symudol ac rydym yn edrych ymlaen at weithio ar brosiectau sy’n greadigol yr un mor heriol o bob cwr o’r DU yn y dyfodol.”
