13/10/08
Y Gweinidog yn mynd ati yn Ysgol y Barri i lansio cystadleuaeth i ddod o hyd i Hyrwyddwyr Newid Hinsawdd 2009
Mae'r gystadleuaeth i ddod o hyd i chwech o bobl ifanc eithriadol i fod
yn ‘Hyrwyddwyr Newid Hinsawdd' wedi cael ei lansio heddiw gan Jane
Davidson, y Gweinidog dros yr Amgylchedd, Cynaliadwyedd a Thai.
Lansiodd y Gweinidog y gystadleuaeth gyda chymorth timau gwyrdd Ysgol
Bro Morgannwg yn y Barri sydd â'u nod ar fod y cystadleuwyr cyntaf ym
Mro Morgannwg i gymryd rhan yn y gystadleuaeth.
Mae Llywodraeth Cynulliad Cymru yn annog pobl ifanc ledled y wlad i
ddilyn esiampl Bro Morgannwg a chymryd rhan yn y gystadleuaeth a
pherswadio ffrindiau, teuluoedd a chymunedau i wneud eu rhan a mynd i'r
afael â'r newid yn yr hinsawdd.
Cafodd y Gweinidog gyfle i gyfarfod â phobl ifanc yr ysgol a dywedodd:
"Mae Llywodraeth Cynulliad Cymru wedi ymrwymo i fynd i'r afael â'r
newid yn yr hinsawdd. Mae'n ddyletswydd arnom i warchod cenedlaethau'r
dyfodol a gwneud popeth y gallwn i addysgu pobl am fanteision gwneud
newidiadau bach i'n ffordd o fyw er mwyn ein cynorthwyo i fynd i'r
afael â'r newid yn yr hinsawdd."
"Mae disgyblion Ysgol Bro Morgannwg yn esiampl wych i bobl ifanc ar hyd
a lled Cymru. Mae gan bobl ifanc rôl bwysig iawn i'w chwarae fel
hyrwyddwyr ymysg grwpiau o'u cyfoedion ac ymysg eu teuluoedd a'u
cymunedau. Rwy'n edrych ymlaen yn fawr at glywed am y syniadau a
gyflwynir gan ddarpar Hyrwyddwyr Newid Hinsawdd ac yn edrych ymlaen
hefyd at weithio'n agos â'r chwe hyrwyddwr buddugol unwaith y cânt eu
dewis."
Mae Ysgol Bro Morgannwg yn aelod o'r cynllun ‘eco-ysgolion' sy'n
cydnabod arferion amgylcheddol mewn ysgolion. Mae'r disgyblion yn
frwdfrydig ac maent yn y broses o sefydlu eco-bwyllgor i ddatblygu eu
cynlluniau gwyrdd eu hunain a'r gobaith yw y byddant yn cael rhagor o
effeithiau cadarnhaol ar y ffordd y mae'r ysgol yn defnyddio dŵr,
trydan, gwres a chludiant.
Mae'r disgyblion yn croesi eu bysedd y bydd un ohonynt yn llwyddo i gael eu hurddo yn ‘Hyrwyddwr Newid Hinsawdd'.
I gymryd rhan yn y gystadleuaeth, mae'r disgyblion wedi bod yn meddwl
am lunio ceisiadau sy'n dangos sut y byddent yn annog eu ffrindiau, eu
teuluoedd, eu hysgol neu eu cymuned i wneud newidiadau bach er mwyn
lleihau eu hôl-troed carbon. Gall ceisiadau fod ar unrhyw fformat
creadigol, er enghraifft erthygl papur newydd, tudalennau gwe neu
gyflwyniad teledu neu radio.
Bydd yr Hyrwyddwyr buddugol yn treulio blwyddyn ‘yn y swydd' yn dangos
sut y gall pobl gymryd camau syml, effeithiol i leihau eu hôl-troed
carbon gan ganolbwyntio ar ynni, dŵr a chludiant.
Unwaith y caiff yr Hyrwyddwyr eu dewis, byddant yn cael amserlen brysur
a fydd yn cynnwys cymryd rhan mewn taith Ewropeaidd er mwyn darganfod
yr hyn sy'n cael ei wneud i leihau allyriadau carbon mewn gwledydd
eraill. Hefyd, byddant yn cael cyfle i fod yn bresennol mewn
digwyddiadau ledled Cymru a chyfathrebu â phobl ynghylch y camau
cadarnhaol y gallant eu cymryd bob dydd i helpu i fynd i'r afael â'r
newid yn yr hinsawdd.
Dywedodd y Pennaeth, y Dr Dylan Jones:
"Mae'r gystadleuaeth ‘Hyrwyddwyr Newid Hinsawdd' yn gyfle gwych i
ddisgyblion adeiladu ar y gwaith yr ydym eisoes yn ei wneud yma i ennyn
ymwybyddiaeth amgylcheddol. Byddwn yn annog y disgyblion i gyd i gymryd
rhan yn y gystadleuaeth gan obeithio y bydd un o'r chwe hyrwyddwr
buddugol yn un o ddisgyblion Bro Morgannwg."
Mae'r gystadleuaeth yn agored i unrhyw berson ifanc yng Nghymru sydd
rhwng 11 ac 18 oed gan gynnwys y rheini sydd mewn ysgolion uwchradd ac
mewn colegau. Y dyddiad cau ar gyfer gwneud y ceisiadau hyn yw 28
Tachwedd 2008. I gael rhagor o wybodaeth neu i gofrestru ar-lein, ewch
i www.walescarbonfootprint.gov.uk.
DIWEDD
Dylid anfon unrhyw ymholiadau yn ymwneud â'r cyfryngau at Daniel Tyte neu Sara Robinson yng nghwmni Cysylltiadau Cyhoeddus Working Word ar 02920 488 778. E-bost daniel.tyte@workingwordpr.com/ sara.robinson@workingwordpr.com
